A Escola de Iniciación de Futuros Gandeiros en Mouriscade convértese no plan de verán para 22 mozos

Leva por nome 'Escola de Iniciación de Futuros Gandeiros', pero en realidade boa parte dos participanes nesta sétima edición xa está moi familiarizada co manexo e coidado diario de explotacións de vacún, pois as súas familias están vinculadaas ao mundo agrogandeiro. Esta iniciativa que poñen en marcha a Deputación, a Federación Frisoa Galega, o Club de Xóvenes Gandeiros de Galicia e a Cooperativa Rural Galega comezou o luns en Finca Mouriscade, e rematará o venres. Avelino Souto, da directiva do Club de Xóvenes Gandeiros, explica que nestes cinco días os 22 participantes, de entre 9 e 19 anos de idade, "traballan por equipos, de maneira que están misturados de distintas idades, e aprenderán a domar becerras, a lavalaas e pelalas, así como a manexalas" de cara á súa participación nun simulacro de concurso de manejadores, previsto para o 24 a partir das 11.30 horas.

Pero tamén haberá tempo para que os monitores lles expliquen a morfoloxía das vacas de leite, así como cuestións relacionadas coa súa alimentación ou co benestar animal. «Das labores que lles propoñemos, non hai ningunha que lles sorprende, están moi familiarizados e hai varios que xa acudiron ás anteriores edicións da Escola», engade Souto. Os traballos prácticos comezaron a media tarde, pero pola mañá os e as asistenes acudiron á inauguración da Escola, a cargo do deputado provincial Jorge Cubela. O tamén alcalde de Cerdedo-Cotobade afirmou que «estamos moi contentos de ver a esta rapazada consciente de que a gandería é unha forma de vida, ten proxección e pode converterser no seu futuro profesional».

Cubela insistiu na necesidade de contar con relevo xeracional para que o sector primario siga tendo vida, e quixo facer fincapé no papel significativo da Finca Mouriscade, «cuxas instalacións levan décadas apostando pola innovación, a investigación e a mellora continua do sctor gandeiro, converténdose nun referente para profesionais, explotacións e entidades de toda Galicia». Cómpre lembrar que esta gandería dependente da Deputación pasou en catro do posto número 35 ao segundo no índice combinado ICO.