ACentral Folque presentará dúas publicacións no Casino de Lalín

ACentral Folque presentará en Lalín dúas novas publicacións dentro do seu catálogo editorial 2025: arte menor, de Susana Sanches Arins, e Tocadoras do Val do Dubra, de Carlos Rey, David Fontán e Lucía Santiago, con transcricións musicais de Benxamín Otero. O acto terá lugar o vindeiro xoves, ás 20:30 horas, no Círculo de Recreo, e contará coa participación de Celso F. Sanmartín, Arins e Otero, nunha conversa sobre os procesos de investigación, recuperación e creación arredor da memoria sonora e da tradición popular galega.

Tocadoras do Val do Dubra é un ensaio que rescata o legado das tocadoras desta área coruñesa, recuperando gravacións históricas de grande valor patrimonial inéditas ata hoxe. Arte menor é un poemario que recolle a aventura de sete mulleres que deciden asistir a aulas de pandeireta e canto tradicional; reivindica o traballo comunitario e a forza das mulleres do rural, dunha tradición viva e en transformación.