Teño uns compañeiros de medo

O CEIP de Figueiroa, en A Estrada, vive estes días unha auténtica festa de cor, creatividade e tradición. Co gallo do Samaín, todo o centro –desde a entrada ata os corredores e mesmo o patio ornamental– quedou completamente cuberto de cabazos, espantallos e decoracións terroríficas feitas polas familias do alumnado.

A responsable da iniciativa é María Blanco Corrales, mestra de Infantil e encargada da biblioteca escolar, quen destaca a enorme resposta das familias: «Mandamos unha nota explicando como iamos celebrar o Samaín e o Magosto, e pediamos colaboración para conseguir unha eira terrorífica. A verdade é que a participación foi bestial», comenta entre risas.

A actividade, que xa é unha tradición no colexio, cobrou este ano unha dimensión especial. Aínda que noutras edicións os cabazos estiveron vinculados ao proxecto anual do centro –como a música, o deporte ou as olimpíadas–, nesta ocasión deixouse liberdade total á creatividade das familias. Só se lles suxeriu un fío condutor: o proxecto anual Labregas, co que o centro traballa valores relacionados coa agricultura e o papel das mulleres no rural, coincidindo co próximo Ano Internacional da Muller Labrega (2026).

«Pensamos que en todas as casas dunha labrega hai unha eira, así que este ano queriamos que fose unha terrorífica», explica a docente. O resultado fala por si só: centos de cabazos decorados, moitos deles con motivos rurais e tradicionais, enchen o colexio.

O éxito foi tal que se organizou un concurso de espantallos para premiar a orixinalidade das creacións. Un pequeno xurado de profesorado será o encargado de elixir o gañador, que se dará a coñecer mañá, coincidindo coa celebración do Magosto e a festa de Samaín.

A profesora recoñece que este é un ano de récord, tanto pola participación como pola extensión do decorado: «É a primeira vez que o patio se ve tan arrebolado de cabazos e adornos. Da moito xogo, xa que é un espazo no que normalmente non acceden os nenos».

Así, entre cabazos labregos, espantallos e fantasmas, oFigueiroa demostra unha vez máis o potencial dunha comunidade educativa unida e involucrada, que desta volta conseguiu tornar os xardíns escolares nun auténtico parque temático.

Suscríbete para seguir leyendo