Un Lalín de Cine ofrecerá sete filmes en galego ata decembro

Un Lalín de Cine. Apostamos polo cinema en galego é a nova proposta da Concellería de Cultura e Política Lingüística. Ofrecerá sete películas noutros tantos domingos desde este mes ata comezos de decembro no Salón Teatro. A entrada será libre e de balde ata completar aforo.

O programa de actividades, todas gratuítas, terá lugar os domingos ás 18:00 horas a partir do próximo 26 de outubro e ata o 7 de decembro. Haberá catro películas para todos os públicos, dirixidas en específico ao familiar (O amencer dos nuggets, 26 de outubro; Wallace e Gromit: A vinganza sérvese con plumas, 9 de novembro; A galiña Turuleca, 23 de novembro, e O monstro mariño, 30 de novembro) e tamén tres filmes para público novo e adulto: As Neves, o 2 de novembro; Rapa, o 16 de novembro; e Antes de nós (sobre Castelao), o 7 de decembro.

A concelleira Begoña Blanco lembra que «xa nas anteriores ocasións que se realizou unha actividade destas características funcionou moi ben». E remarca que, con este programa, preténdese «facilitar o acceso ao cine en galego, promovendo a normalización lingüística e o acceso á cultura na nosa lingua». Conta co apoio da Secretaría Xeral da Lingua.