Leticia López Rey, ‘(in) Visible’ en Silleda

O Concello de Silleda nomea como (in)Visible do mes de maio a Leticia López Rey, veciña de Escuadro nada en 1993, pola súa destacada traxectoria na preservación e difusión da música tradicional galega. Afincada en Santiago, iniciou a súa andaina musical aos 14 anos no grupo O Son da Fervenza da súa parroquia. A súa relación coa música vén da infancia, grazas á súa avoa, Josefa Méndez López, quen lle transmitiu cantigas e lle ensinou a tocar a pandeireta, herdanza das ruadas de Xestoso. Desde 2014, traballa na recollida de tradición oral xunto con Miguel Barbazán Lesta e Alejandro Martínez, centrando os seus esforzos en cantigas e bailes en risco de desaparecer. «O patrimonio inmaterial, especialmente aquel que habita só na memoria das persoas maiores, é o máis efémero», sinala. A súa implicación vai máis alá da recuperación: procura garantir a transmisión viva e consciente destas expresións ás xeraciónsmáis novas.

En 2021 iniciou o grao en Historia para reforzar o seu labor investigador. Agora compaxina esta tarefa coa docencia, formando novas xeracións en canto tradicional e pandeireta, e integra a sección oficial de pandereteiras de Cantigas e Agarimos. Silleda enxalza así a súa figura como exemplo de compromiso coa cultura e coa identidade galega, recoñecendo o seu labor para manter vivas as tradicións que definen o patrimonio inmaterial. A súa historia amosa como o legado das xeracións anteriores pode converterse en forza transformadora para o presente e futuro.