A residencia de Cruces adica a Neira Vilas unha biblioteca

A residencia municipal de Maiores de Vila de Cruces leva tempo inmersa na creación dunha nova biblioteca, un espazo pensado para fomentar a lectura e preservar a memoria cultural. Tras un proceso participativo, escolleuse bautizala co nome de Biblioteca Balbino, en homenaxe a Xosé Neira Vilas, autor de Memorias dun neno labrego. O nome escollido fai referencia ao protagonista da súa obra máis emblemática e, segundo sinalan desde a residencia, o obxectivo é manter viva a súa palabra e o legado dun dos grandes da literatura galega. Ademais, desde o centro quixeron agradecer a colaboración da Secretaría Xeral da Lingua, que fixo unha importante doazón de libros, entre os que se atopan exemplares do propio Neira Vilas que enriquecerán o fondo da biblioteca.