Homenaxe aos requinteiros Marcelino e Pepe tras décadas de músicas populares

Requinta sempre é o título do novo disco do grupo de música tradicional A Gaita de Sarandón, que serve tamén como homenaxe á dilatada traxectoria de Marcelino de Muiñeiro (nome artístico de Marcelino Brey) e Pepe de Nande (José Alvela), dous veteranos requinteiros de Vedra que abandonan os escenarios tras décadas difundindo as melodías populares galegas.

A requinta é unha frauta traveseira de madeira cunha soa chave, moi típica das zonas do Ulla, que se toca para acompañar as gaitas e que foi tremendamente popular nesta contorna durante o século dezanove e comezos do vinte. Porén, o seu uso caeu de forma notoria durante as décadas de 1960 e 1970, aínda que ten sido recuperada por diferentes agrupacións culturais en tempos recentes.

Nestes traballos ten sido clave a aportación de persoeiros como Marcelino e Pepe, próximos os dous aos noventa anos, que gardan a memoria duns sons e dun instrumento que xa interpretaban de nenos e de mozos polas aldeas de Vedra.

Agora, case dúas décadas despois de teren participado na primeira gravación da Gaita de Sarandón, volven participar nun traballo dun colectivo que leva máis de vinte anos en activo e que presentou a súa nova música esta pasada fin de semana na casa da cultura desta parroquia vedresa. Un acto que tamén serviu como despedida dos escenarios dos dous históricos requinteiros.