O CEIP Plurilingüe de Silleda conseguiu o primeiro posto no premio nacional Elk Sport, que valora a Educación Física segura e responsable e as iniciativas que mellor se adapten á actual situación sanitaria. A proposta gañadora –xestionada polo mestre Diego Castro Taboada, titor de 5ºB de Primaria– contempla espertares máxicos (activación neuromuscular antes do comezo da xornada), descansos activos (cuñas motrices de actividade física entre sesións teóricas), patios dinámicos, almorzos saudables ou sesión off (relaxación na última hora). O premio implica un vale de 2000 euros para mercar material deportivo.
