A Algarabía xa ten datas para a súa vindeira edición e once grupos musicais confirmados. A festa que organiza a Asociación Cultural O Naranxo en espazos públicos de Lalín terá lugar entre o venres 30 de agosto e o domingo 1 de setembro.
Grima, Meu, Mentah e Krise son as agrupacións que figuran no cartel para a primera xornada. Ao día seguinte, sábado 31, actuarán Tiro na Testa, Blowfuse, Falperrys e Malavita, mentres que o peche do domingo correrá a cargo de Ith. Ademais, a formación local Nós encargarase de animar a sesión vermú sabatina e Telegraph Vadis fará o propio coa dominical.
Amais de música en directo, esta irreverente festa contará con espazos para a arte, a gastronomía, os xogos ou prácticas urbanas como parkour e graffiti. Tampouco faltará a habitual acampada gratuíta.
