"Para min isto é toda unha novidade, recibir un recoñecemento deste tipo, pero estou orgulloso", declarou onte Luis Davila, a quen o padroado dos San Martiño decidiu conceder o premio á normalización no ámbito galego. Explica este deseñador gráfico e humorista, colaborador habitual de FARO DE VIGO, que sabía dos premios que promove O Brado na Estrada polos medios de comunicación. "Vendo a calidade dos premiados doutros anos, para min é todo un orgullo que me recoñeza esta asociación", sinala. "Eu o que fago é tratar de reflictir a idiosincrasia e como somos os galegos a través do humor, ademais da denuncia da actualidade", afirma Davila. "Emprego o galego por convicción propia. É o meu humor e o meu modo de expresarme máis fundamental. Síntome moito máis cómodo facéndoo en galego e, sendo así, se consideran que son parte da difusión e da normalización do galego neste país, estupendo", manifesta cando se lle indica que lle chega este recoñecemento polo uso do idioma a nivel de toda Galicia. Non deixa de recoñecer que recibir este galardón "foi toda unha sorpresa", tendo en conta que estes premios concédense sen que un se presente.