Pablo Prieto, sen rival para continuar como presidente da Federación Galega

Pablo Prieto Perille foi aclamado este luns como presidente da Real Federación Galega de Fútbol pola nova Asamblea Xeral que unha vez constituida deu o seu respaldo unánime a Prieto, que foi o único candidato que se presentou ás eleccións á presidencia.

Deste xeito a RFGF dalle continuidade a un proxecto iniciado por Rafael Louzán a principios de 2015 e que foi continuado por Pablo Prieto unha vez que Louzán foi elixido presidente da Federación Española. Agora, o ferrolán será presidente logo de superar un proceso electoral no que contou co respaldo unánime de todo o fútbol e o fútbol sala de Galicia.

Pablo Prieto dirixiuse aos asambleístas nunha primeira intervención como presidente provisional, posto que agora ábrese un prazo dunha semana para a presentación de posibles recursos e será o 7 de xullo cando será proclamado oficialmente presidente e tomará posesión do cargo. No seu discurso aproveitou para dar as gracias a todos os clubs, futbolistas, árbitros e adestradores que lle mostraron o apoio e “o meu equipo directivo por acompañarme neste proceso”. Quixo tamén acordarse de Rafael Louzán “pola confianza depositada na miña persoa e polo legado que nos deixou”.