Luar na Lubre celebra o seu 40 aniversario no festival Chandefolk

Chandebrito volve a converterse este sábado, día 29 de agosto, na capital do folk, cun concerto dun dos grupos de referencia na actualidade. Luar na Lubre fará unha parada da súa xira «40 aniversario» no festival Chandefolk, que organiza o Concello de Nigrán en colaboración coas entidades da parroquia, e alí repasará os grandes éxitos da súa andaina musical.

A formación coruñesa chega a Nigrán tras recibir a Medalla Castelao da Xunta en 2025 e ratifica o Chandefolk como cita impescindible para os amantes do xénero tras ter acollido en anteriores edicións a Milladoiro, Budiño, Susana Seivane ou Xabier Díaz e Adufeiras do Salitre. Terá lugar na carballeira de Chandebrito a partires das 21.00 horas e contará tamén coas miñoranas Pandeireteiras do Sobreiro como abreconcertos.

Luar na Lubre ten vendido más de 350.000 exemplares dos seus traballos e recibiu dous discos de ouro, nove premios da Música e outros recoñecementos dentro e fóra de Galicia, participando mesmo en festivais con artistas internacionais como The Waterboys, The Corrs ou Bob Geldof e españois como Víctor Manuel, Miguel Ríos, Luz Casal, Ismael Serrano, Pedro Guerra ou Diana Navarro. A banda naceu no ano 1986 coa vocación de divulgar a música e a cultura galegas e está formada na actualidade por Bieito Romero (gaitas, acordeón, zanfoña), Cristina López (voz), Nuria Naya (violín), Patxi Bermúdez (bodhran, tambor), Pedro Valero (guitarra acústica), Xavier Ferreiro (percusión latina, efectos), Xan Cerqueiro (frautas) e Brais Maceiras (acordeón).

O concerto de Chandebrito será inclusivo para persoas con problemas de audición e disporá de mochilas vibratorias para quen as solicite previamente no mail info@entresignos.com ou no WhatsAppp 690679675.