Vinte anos de desagravio en Baredo

Volveu reinar o silencio na curva da Bombardeira, coma hai 89 anos cando alí foran fusilados a mans de falanxistas nove miñoráns. Volveu ao mesmo lugar, por vixésimo ano consecutivo, o resarcimento das vítimas do brutal crime que toda a comarca lembra coma o da Volta dos Nove. A homenaxe do Instituto de Estudos Miñoráns a aqueles represaliados cumpriu onte vinte anos con máis forza ca nunca.

Familiares dos asasinados e veciños reuníronse unha vez máis en torno á escultura de Fernando Casás para facer unha ofrenda floral e lembrar a arrepiante historia de vinganza que comezaba co asalto falanxista á casa dos irmáns anarquistas Os Ineses en Sabarís, onde morreron eles, a súa asistenta, Dolores Samuelle, e un dos sublevados.