Un Porriño cheo de creatividade

Fai apenas dúas semanas que a xuventude porriñesa se reunía na confluencia das rúas Fernández Areal e San Sebastián para celebra-la presentación da revista "Vendoseatibiza" e, así, conmemorar a tódolos que apostan pola creatividade e o maxín. Trátase dunha publicación que recolle reportaxes e entrevistas ó redor das novas tendencias do mundo da arte e da modernidade da vila, dando cabida a músicos, grafiteiros, bailarinas, cociñeiros, deseñadores, videocreadores ou publicistas, cun denominador común: o da súa orixe porriñesa.

"A revista presenta un grande atractivo visual e enténdese por si mesma coma unha obra de arte, polo que se lle deu unha grande importancia ó ámbito das fotografías, ilustracións e mesmo da publicidade, tentando tamén que o elemento publicitario se converta nunha serie de imaxes concatenadas cun marcado carácter artístico, onde o corpo humano aparece como espazo de escaparatismo", explica David Pérez "Cato".

A revista está patrocinada polo colectivo de bares e pubs do Porriño, Espacio Noite, que propiciaron que fose de balde e tamén contou coa colaboración do Concello. Durante a presentación varios grafiteiros do Porriño fixeron unha exhibición acompañados por un DJ de hip-hop, dando paso á música da charanga Anchoa e á actuación do dúo humorístico "Cada día peor". Tamén houbo videocreacións e videoproxeccións a cargo de Agar Fernández e Begoña Rodríguez, rematando coa actuación da videojockey Lisi González.