O Celta esconde a un «xogador esquecido»: un Samaín cheo de misterio en Balaídos

Un armario pechado dende hai anos, micrófonos que comezan a moverse ou un asento deserto. O misterio inunda Balaídos en pleno Samaín da man de Mauro, un «xogador esquecido» cuxo espírito aínda reside no estadio. Esta é a trama escollida polo Celta para un 'tour' especial organizado para os máis pequenos na tarde do venres 31 de outubro -ás 18.30 horas- e no mediodía do 1 de novembro -ás 12.00 h-.

Mauro «era unha gran promesa, pero nunca chegou a debutar» e, pasado o tempo, todo o mundo esqueceu o seu nome, explica o propio club na súa páxina web. Porén, neste 2025, o ex-futbolista celeste vai reaparecer para reencontrarse coa que foi a súa casa, Balaídos, e cos seus afeccionados nunha visita guiada «polos recunchos máis enigmáticos e descoñecidos do estadio».

Os xoves seareiros, xunto coas súas familias, terán a oportunidade de coñecer o campo do Celta entre «risas, sustos e algunha sorpresa», asegura a entidade celeste.

Cada pase permitirá, ademais do paseo por Balaídos, o acceso ao Museo Celta e gozar dunha experiencia inmersiva, cunha duración total estimada de 1 hora e 15 minutos. Igualmente, se ofrecerá un detalle como lembranza do día.

Os interesados deberán acceder ao recinto a través da Área Celtista, situada entre as portas 14 e 15, na zona da grada de Marcador. O club pide tamén levar o DNI ou libro de familia para comprobar a idade. As entradas pódense mercar a través deste enlace. Os prezos varían segundo a idade e a dispoñibilidade do Carné Celtista ou de abonado.

Entradas para o partido fronte ao Espanyol

O Celta puxo este martes á venda as entradas exclusivas para posuidores do Carné Celtista para o partido que disputará en casa contra o Espanyol, previsto para a xornada da fin de semana do 29 e 30 de novembro, aínda que sen data exacta, o que dificulta a súa compra con tanta antelación. Mañá abrirá o despacho para todo o público.

Os importes oscilan dende os 25 euros na grada supletoria de Gol ata os 80 de Tribuna Alta, sen contar os paquetes 'premium', por enriba dos 100 euros.