Turismo outonal para descubrir o mellor de Galicia

O Concello do Porriño ven d einiciar un novo programa de excursións ecoturísticas dirixidas a persoas maiores de 55 anos, que se desenvolverán durante este mes de novembro.

Trátase de tres saídas organizadas co obxectivo de fomentar a educación ambiental e o turismo sostible entre a veciñanza, ao tempo que se ofrece unha oportunidade de lecer e convivencia.

As viaxes realizaranse os días 4, 11 e 19 de novembro e combinarán unha visita ao Complexo Medioambiental de Sogama, en Cerceda, cun percorrido polos principais puntos de interese turístico e patrimonial das provincias da Coruña e Pontevedra. En concreto, as paradas programadas serán na cidade da Coruña, Santiago de Compostela e o Pazo de Oca, na Estrada.

A proposta é totalmente gratuíta para as persoas participantes e está pensada para promover a conciencia ambiental entre a poboación maior, poñendo o foco na importancia da separación correcta dos residuos, a redución do lixo e o consumo responsable. Ademais, permitirá coñecer de preto o funcionamento dunha das instalacións máis avanzadas de Galicia en materia de xestión ambiental.

Visita a Sogama

Durante a visita a Sogama, incluída en cada unha das tres xornadas, os asistentes poderán asistir a unha charla formativa e participar nunha experiencia inmersiva mediante lentes de realidade aumentada, que lles permitirá coñecer o proceso de tratamento de residuos de maneira interactiva. Tamén se organizará un xogo educativo sobre reciclaxe e unha visita guiada polas instalacións, que inclúe o laboratorio e a sala de control.

Cada unha das excursións completarase cun xantar incluído e unha visita guiada polos lugares máis emblemáticos das diferentes localidades.

Diferentes destinos

Na Coruña, o 4 de novembro, o grupo percorrerá a contorna da Torre de Hércules, o paseo marítimo e o casco histórico. O 11, en Santiago de Compostela, o itinerario incluirá a Praza do Obradoiro, a Catedral e as rúas do centro histórico. Finalmente, o 19, a excursión ao Pazo de Oca permitirá desfrutar dos seus xardíns históricos e do seu patrimonio natural e arquitectónico, coñecido popularmente como o «Versalles galego».

O alcalde do Porriño, Alejandro Lorenzo, subliñou que con esta iniciativa «apostamos por actividades que acheguen á cidadanía ao coidado da súa contorna dun xeito práctico e útil. Estas excursións combinan a educación ambiental coa posta en valor do noso patrimonio, ofrecendo unha experiencia completa e enriquecedora».