Ocio e cultura nos mellores escenarios

O verán de Nigrán mídese nos seus festivais, que ano tras ano batallan por converterse nos máis senlleiros da programación sociocultural de verán.

Así, neste mes de xullo, que pronto comeza, non faltarán no calendario municipal os seus eventos máis aclamados, como son «Solpor Monteferro» no miradoiro (4 e 5 de xullo); no esteiro de A Foz «Cinema a Pedal» (10 ao 12 de xullo ) e «Nigranjazz» (18 e 19 de xullo); «Reggaeton Beach Festival’» en Porto do Molle (26 e 27 de xullo) ou a divertida concentración de artefactos flotantes «Flota como Poidas»» na desembocadura do río Miñor (27 de xullo).

En agosto o Concello seguirá tamén na sintonía dos pasados anos co gaiteiro Carlos Núñez en Monteferro como prato forte no seu inicio (2 de agosto); o festival míudo «Parrulas Fest» no esteiro de A Foz (do 4 ao 7 de agosto); «Cine no Muíño» en Porto do Molle (11 e 18 de agosto); «Nigranblues» en Gaifar (16 de agosto) e Chandefolk en Chandebrito (23 de agosto).

Programación

Toda a programación polo míudo será pendurada na web municipal www.nigran.es, no momento no que estea dispoñible. Poderá atoparse no apartado «Próximos Eventos») e ao longo do verán iranse engadindo máis actividades e todas as novidades ainda por vir.

Deporte

Os eventos deportivos clásicos tampouco faltarán á tradicional cita de verán. Estes arrancan coa décima edición do torneo de rugbi-praia «Melgachos» en Praia América, continuará cos nadadores de «Costa Serena» o domingo 13 de xullo e haberá «Ioga no Solpor» en Patos todos os martes e xoves de xullo e agosto; ademais das xa tradicionais actividades deportivas na praia.

Outros eventos

Polo medio intercálanse eventos como a feira de antigüidades o 5 e 6 de xullo no Pavillón de Panxón, o concerto de habaneras da coral Novos Aires o día 5 de xullo; a sardiñada de Monteferro o 6 de xullo; o tradicional encontro de violonchelistas «Soncello» que culminará con tres concertos en diferentes localizacións (13, 15 e 17 de xullo); o «Día dos Avós» o 26 de xullo; as festas de San Fiz, patrón de Nigrán, o 31 de xullo e 1 de agosto; a Festa dos ovos con chourizo de Parada o 8 de agosto, o mesmo día o concerto de Rubén Simeó; romería no muíño de Porto do Molle o 9 de agosto; o festival DJ Atlantica Beach Party o 14 de agosto en Praia América; concerto de De Vacas o 15 de agosto ou de Serafín Zubiri o 30 de agosto.

O alcalde de Nigrán explica sobre a liña de programación estival pola que o Concello optou este verán que: «seguimos na mesma liña que os anos anteriores, apostando por diferentes eventos e festivais pensados en todo tipo de públicos e que, de xeito contrastado, sabemos que funcionan e que son moi agardados».