Microteatro nas parroquias, a nova proposta da Asociación Dramiño

O grupo de teatro Dramiño, de Salvaterra de Miño, presentará este verán un novo formato: «Dramiño de Rolda», que consistirá nunha xira por oito parroquias da vila cunha proposta baseada na representación escénica do microteatro.

En cada actuación, que terá unha duración aproximada dunha hora, o grupo representará catro «píldoras» teatrais do xénero da comedia, cuxa temática non estará relacionada coa anterior.

«O público pode chegar e non conectar coa peza, pero sabe que a seguinte vai ser diferente e pode gustarlle» explica Ángel Vidal, presidente da Asociación Dramiño.

Ademais, conta que «a idea, sempre que o tempo o permita, é realizar as representacións no exterior en formato de teatro de rúa».

Está previsto que a actividade comece a finais do mes de xullo.

A maiores, a asociación conta por segundo ano consecutivo cunha actividade de teatro para nenos e nenas, no que a cativada ensaia polas mañás durante os meses de verán, e presentará a obra unha vez rematado dito obradoiro.