Desfrutar da natureza e mellorar a saúde física é posible en Ponteareas

O Concello de Ponteareas, a través da concellería de Benestar Social, elabora o primeiro programa estival de actividades deportivas ao ar libre.

As actividades, dirixidas ao público maior de 18 anos, serán gratuitas e nacen coa finalidade de «aproveitar ao máximo os activos en saúde que posúe a vila, especialmente os espazos naturais, para a práctica deportiva».

Con todo, durante os meses de xullo, agosto e setembro a contorna da Freixa acollerá obradoiros de taichí, hipopresivos e ximnasia de mantemento.

As actividades estableceranse en varias quendas. Deste xeito, os horarios no mes de xullo teran lugar de luns a xoves en horario de maña.

As clases de taichí realizaranse os luns e mércores ás 10:00 horas. Os martes terán lugar as clases de hipopresivos ás 11:00 horas e por ultimo, os xoves, será a quenda da ximnasia de mantemento, que comezará ás 11:00 horas.

Non é preciso inscrición previa, tan só é necesario achegarse na hora desexada á zona onde está colocada a tarima, fronte aos «chiringuitos» da Freixa.

A alcaldesa de Ponteareas, Nava Castro, salienta «a importancia de ofrecer ás veciñas e veciños propostas de calidade que melloren o día a día das persoas, deseñando iniciativas a medida das suas necesidades».

«Pequenas e grandes accións súmanse para que entre todas e todos fagamos unha vila máis agradable, habitable e na que atopar todo o necesario», asegura a rexedora local.

A actividade é posible grazas a unha subvencion da Red Española de Ciudades Saludables, unha entidade que ten como obxectivo buscar actividades encamiñadas a fomentar e conseguir cidades mais saudables a traves da colaboración coas entidades municipais, neste caso en concreto, co Concello de Ponteareas.