«Olympics4all» gaña medallas e amizade

O salón de plenos do Concello de Tomiño acolleu o acto de peche de tempada da iniciativa «Olympics4All», unha actividade da Eurocidade Cerveira-Tomiño que busca promover a práctica deportiva entre as persoas maiores de 60 anos, reforzando o intercambio social e cultural entre municipios de ambas as dúas beiras do Miño.

Nunha competición na que o equipo da Eurocidade alzouse coa vitoria nos últimos cinco anos de forma consecutiva, as e os 42 integrantes do equipo presumen de títulos. Composto ao 50% por homes e mulleres de Cerveira e Tomiño, a maior parte das e dos integrantes participan nesta actividade dende o principio, «ilusionadas e ilusionados como o primeiro día, cheos de vida e sen faltar nunca» a ningún dos dous adestramentos que se levan a cabo en Cerveira.

A alcaldesa de Tomiño, Sandra González, quixo felicitar ás persoas participantes nesta iniciativa, destacando que o proxecto segue a ser un referente de éxito. «Estades a demostrar que o deporte non ten fronteiras, que a saúde e a amizade poden cultivarse sen importar a idade», resaltou.

Un éxito no que tamén fixo fincapé o concelleiro de Deportes de Tomiño, Rubén García, que destacou o valor dunha iniciativa que promove a convivencia entre os veciños e veciñas da Eurocidade, pero tamén as boas prácticas para unha vida saudable.

No acto tamén estivo presente o presidente da Cámara Municipal de Vila Nova de Cerveira que subliñou «o traballo excelente que, ademais de promover a actividade física, axuda a socializar e competir, sentíndose parte dun mesmo equipo».