A comarca vistese de luces (de Nadal)

Non só a grande cidade ten luces de Nadal. Todas as localidades pequenas e grandes mostran estes días o potencial do alumeado decorativo como polo de atracción de centos de visitantes e gozo das veciñas e veciños. Miles de lámpadas led foron colocadas nas principais rúas e lugares emblemáticos das nosas vilas para anunciar unha época diferente.

Están os decorados continuistas que realzan a fermosura das vilas e e pequenas cidades e son un elemento máis para fortalecer as paisaxes urbanas e rurales da nosa comarca. Tamén están as apostas máis atrevidas como o vestiario de led tirando a dourado que levan a elegancia aos adornos.

É o caso de Porriño, que este ano xogou a namorar dándolle cor de ouro á noite, o que conxuga coas pedras centenarias das suas principais rúas.

Hai centos de luces postas sobre as rúas, pero tamén bólas para entrar no corazón do Nadal, cubos en forma de regalo onde os visitantes se meten para fotografiarse e lembrar que o regalo somos nós, cando enviamos unha fotografía ás persoas que queremos.

Hai figuras feitas con luces que son miles de veces fotografadas. Pode ser o exemplo de trineo con renos da cidade de Tui, ou o boneco de Salceda, posto na entrada como elemento de xogo coa infancia, nunha das vilas máis novas de Galicia.

E este ano volve de novo o videomapping; a idea tróuxoa no 23 o Concello de Ponteareas e agora tamén a podemos ver en Tomiño. A proxección de imaxes en edificios públicos son un un novo elemento decorativo para momentos especiais. As novas tecnoloxías axúdannos a entrar nun mundo de fantasía que é moito mellor no Nadal, para grandes e pequenos.

As comarcas da Área de Vigo mostran estes días o seu bo facer e ilusión dos seus concellos polo Nadal, unha festa que é posible en cada lugar, que sempre é diferente e ilusionante.