Gondomar colocou unha pantalla xigante para apoiar a Desirée Vila

O Concello de Gondomar instalou este xoves, 5 de setembro, unha pantalla xigante para retransmitir en directo o debut da gondomareña Desirée Vila. A deportista estaba en París para competir nos Xogos Paralímpicos. A partir das 19:00 horas, todo o municipio puido gozar desta retrasmisión no Auditorio Municipal Lois Tobío. “Desde Gondomar imos apoiala con todas as forzas”, sinalaban desde o goberno local.

A atleta gondomareña competía o xoves en salto de lonxitude na categoría T63. A finais de maio, logrou a quinta posición no Mundial Paralímpico desta categoría, que tivo lugar en Xapón, tras asinar unha marca de 4,36 metros.

Nos Xogos Paralímpicos de París buscaba mellorar a súa mellor marca persoal histórica, que cultivou en maio en Basauri. Esta foi de 4.40 metros, que lle permitiu superar a mínima establecida para poder competir na cita que se celebra na capital francesa.

Xa en París, Desi Vila estivo a compartir todas as experiencias, onde nos días previos á competición mostrou aos seus miles de seguidores nas redes sociais como é o comedor da vila paralímpica. Ademais, mostrou os obsequios que se entregan a cada un dos participantes no evento deportivo no que soña participar cada deportista.

Desirée Vila é o exemplo perfecto de superación e capacidade de adaptación, no que un accidente obrigoulle a seguir os seus soños, pero por novos camiños. A deportista era afeccionada á ximnasia acrobática, que combina elementos da ximnasia artística, a danza e a acrobacia, sendo unha da disciplina máis complexas e esixentes. Empezou a competir e pronto alcanzou o éxito, as súas capacidades levárona a competir no VIII Maia International Acro Cup e mesmo participou no Campionato do Mundo en París.

Durante un adestramento sufriu un accidente que lle supuxo a fractura de tibia e peroné. Diferentes erros médicos e atrasos no diagnóstico supuxeron a amputación da súa perna dereita. Desirée Vila non se deixou vencer pola adversidade e continuou a súa carreira deportiva no atletismo adaptado. Esta deportista tamén escribiu un libro, “O único incurable son as ganas de vivir”.