Tenis, fútbol e naútica en Baiona

O Concello de Baiona, a través da Concellería de Deportes, deseñou unha ampla axenda deportiva para os próximos meses. A cita máis inmediata será o vindeiro sábado, 27 de maio, coa II Xornada Lúdica de Tenis de Mesa, de 10.00 a 12.00 horas no pavillón municipal.

Xa para o mes de xuño están programados, o día 10 o XV Torneo de Tenis Escolar; o 10 e o 11 o Torneo Fútbol Sala Vila de Baiona Senior e o 16, 17 e 18 categoría base.

Para complementar o peche do curso 2022-2023 das Escolas Deportivas Municipais programouse para o día 17 de xuño a xa tradicional viaxe ás Cíes. Ese mesmo sábado será o Campionato de España e Galego de Pádel Surf, a carreira de orientación “Vigo Orienta” e a Regata Solar Marine Instruments.

Semana azul e verde

E para os máis pequenos da casa organízase a última semana de xuño, do 26 ao 30, a campaña de fomento dos deportes náuticos “Semana Azul 2023” e a acampada escolar “Semana Verde” na Praia e no Cámping da Ladeira.