Moaña celebra mañá a súa XIII Feira Ecoartesá

Co outono chega unha nova cita coa Feira Ecoartesá de Moaña. Son dúas as datas no ano na que, dende 2015, se celebra este evento que reúne a numerosas persoas nesta vila do Morrazo, en primavera e agora coa caída da folla.

A mostra de produtos ecolóxicos, artesáns e de agricultura sustentable traerá mañá domingo, día 9, medio centos de postos á zona paseo marítimo e na contorna do palco da música. Neles ofreceranse dende obxectos de segunda mal e reciclados ata auténticas antigüidades.

En concerto, nesta décimo terceira edición, haberá postos con produtos da hora (de km 0), mel, especias, froitos secos, repostería saudable, pan e empanadas, xabóns e cosmética natural, xoguetes e instrumentos artesáns, pratería, artesanía en coiro, produtos de segunda man (libros, discos...), antigüidades e non faltará tampouco unha polbeira para a hora do xantar.

E é que a Feria Ecoartesá de Moaña celébrase ao longo de todo o día, dende as 11 da mañá ata as 9 da noite, en horario ininterrompido e, de xeito paralelo, con diversas actividades de lecer para toda a familia, infantís e actuacións musicais para amenizar a xornada.

O grupo de pandereteiras Salgharitas tocarán na sesión vermú, a partir das 12.30 horas. Xa pola tarde, de 17.00 a 19.00 horas a asociación Trebellos impartirá unha serie de obradoiros dirixidos aos máis pequenos da casa, nos que realizarán manualidades con material de refugallo e follas secas. Antes, a partir das 16.00 horas, abrirase un espazo para montar e fotografar cabalos a cargo da asociación ADOC Cabaleiros de Moaña.

A media tarde, representación do espectáculo de clown e escapismo “A vida tola” da man de Pajarito, ás 18.00 horas. E a continuación, ás 19.00 horas, como broche de ouro da xornada actuación do grupo 2 con 2.