A oportunidade de ver en concerto a Beret terémola na Guarda o vindeiro mércores, 17 de agosto, nun concerto que será gratuíto. O artista dará un concerto no porto da vila ás 22.00 horas, forma parte da programación de Concertos do Xacobeo 2022. O artista, que mestura pop urbano e reggae, aínda que evita o uso de etiquetas musicais, cativou as grandes masas co seu tema máis exitoso ata o momento, “Lo siento”.
O single foi certificado cinco veces Platino en España, conseguiu chegar todo o máis alto da lista de radio do noso país e acumula máis de 90 millóns de streams e 300 millóns de visualizacións en Youtube. Beret acumula en total máis de mil millóns de reproducións en plataformas dixitais e o single foi premiado á Mellor Canción do Ano 2019 nos premios Os 40 Music Awards. Ademais, Beret recibiu o Premio Odeón como Mellor Artista Español do ano.
Despois do rotundo éxito conseguido con “Lo siento”, Beret conseguiu manterse na fala da xente grazas a singles como “Me Llama” ou “Te echo de menos” , ata que en 2019 lanzaba o seu altamente anticipado álbum de estudio, Prisma.
O seu álbum alcanzou o segundo lugar na lista de álbums físicos durante a súa primeira semana e mantívose na primeira posición da lista de álbums streaming durante 4 semanas e xa acumula máis de 20 millóns de streams desde o seu lanzamento.
Agora mesmo o artista sevillano atópase gravando o seu próximo álbum, do que xa saíron algúns singles entre os que destaca o seu éxito “Porfa no te vayas” cos colombianos Morat.
Programación
A vindeira fin de semana, do venres 19 e o sábado 20 de agosto, A Guarda acollerá o III Encontro do Libro Luso Galaico na Praza do Reló.
Tamén o vindeiro sábado, A Guarda terá feira de oportunidades outlet organizada por Acigu, na que se poderán encontrar produtos de calidade a prezos moi rebaixados.
O mércores 24 de agosto, o adro da igrexa parroquial acollerá ás 20.30 horas, o concerto Música no Ar. Un enveto organizado pola Deputación de Pontevedra.
O venres 26 de agosto, unha proposta teatral. A obra “Crónicas do Paraíso” na Praza do Reló, ás 21.30 horas.
O Festival de baile moderno “Remember” será, ás 20.00 horas, no auditorio de San Benito, organizado pola Asociación Cultural Xamaraina.
O 28 de agosto será a Carreira Pedestre Virxe da Guía, ás 19.00 horas, e partirá da Praza da Guía.
Subida ao Trega nas Festas do Monte na Guarda
Fin de semana grande das Festas do Monte que comezaron na Guarda o pasado luns, 8 de agosto, e que se prolongarán ata este luns, 15 de agosto. Están organizadas pola Asociación Veciñal Cultural e Deportiva Alameda e hoxe está previsto o desfile folklórico e das bandas mariñeiras a partir das 11.30 horas. Pola noite, ás 22.30 horas, verbena na alameda coas orquestras Ritmo e Grupo Bahía, con José Costas e a cantante Sabela. Mañá, domingo 14, desde a mañá terá lugar a subida das bandas ao Monte Trega. Ás 21.30 horas dous grupos musicais amenizarán a verbena. Finalmente, o luns 15, será o Día do Neno, e toda a tarde as entradas para as atraccións serán ao 50% do seu prezo. Ás 21.00 horas, actuación de Dansá Centro de Danza no auditorio e ás 00.00 horas terá lugar unha gran tirada de fogos de artificio, no porto guardés, anunciando o final das festas. Esta festa está declarada Festa de Interese Turístico de Galicia.
