A Guarda conta cunha paisaxe e patrimonio destacados e moitos visitantes desfrutan fotografando para gardar esa imaxe no seu recordo.
Como primeira acción de promoción turística para este novo ano acordouse realizar un calendario fotográfico onde as fotos sexan as protagonistas.
Na selección das imaxes procurouse manter a temática da auga e do mar como elemento unificador, sen esquecerse do patrimonio e as festas.
As fotografías foron aportadas por tres veciños que comezaron a colaborar co Concello. Na primavera de 2021 mantivéronse contactos con fotógrafos afeccionados e veciños da Guarda para mellorar a imaxe fotográfica e ofrecer novas panorámicas co estilo propio deste veciños.
Despois destas conversas acordouse a creación do Grupo Capturando A Guarda e que está integrado por Lecio Alonso, Dionioso Ameal e Emilio Baz.
A finalidade deste grupo é que A Guarda mellorara a súa imaxe turística nas diferentes actuacións e accións promocionais e os tres fotógrafos afeccionados poderán dar a coñecer a súas fotos, que estarán identificadas co nome de seu autor e co agradecemento como Grupo Capturando A Guarda.
4.000 exemplares
Na tardiña do pasado luns formalizouse a colaboración conxunta coa sinatura do contrato de cesión de fotografías entre o alcalde, Antonio Lomba, e os integrantes do Grupo Capturando A Guarda, Lecio Alonso, Dionioso Ameal e Emilio Baz.
Neste acto tamén estivo presente o concelleiro de Turismo, Rafa Álvarez, que aproveitou para presentar ao Grupo Capturando A Guarda e tamén ao calendario fotográfico como a súa primeira participación dentro do proxecto para a renovación imaxe fotográfica da vila.
O calendario fotográfico Concello da Guarda será distribuído entre veciños, visitantes e turistas para que leven un cachiño impreso da paisaxe desta localidade mariñeira. Hai dispoñibles 4.000 exemplares e poderán recollerse na Oficina de Turismo e na Casa dos Alonso.
