Dobre sesión de contos para bebés e cativada en Baiona

A Concellaría de Cultura, a través do Arquivo Histórico e Biblioteca Pública Municipal, programou catro contacontos infantís enmarcados no programa de dinamización da lectura “Ler conta Moito”. Dous deles xa se celebraron e quedan por celebrarse “Contacontos para bebés” a cargo de Pavís pavós, o vindeiro mércores ás 18.00 horas, e o luns 18, á mesma hora, “Aprende a contar contos” pola Escola das Utopías. O primeiro vai dirixido a nenos de 0 a 3 anos, acompañados dun adulto, e o segundo é para cativada a partir dos 14 anos.

Por cuestións de seguridade sanitaria, é imprescindible a inscrición previa para cada un deles na biblioteca ou chamando ao número de teléfono 986 35 59 43.

Novo horario

O Arquivo Histórico e Biblioteca Pública Municipal do Concello de Baiona retomaron o horario de inverno, de luns a venres de 09.00 14.00 e de 16.00 a 20.00 horas. Os sábados o servizo estará en funcionamento de 09.30 a 13.30 horas.

Xa desde o mes de xullo, a colección está aberta a todas as persoas usuarias do servizo, podendo estas escoller libremente nos estantes en sala.

Concurso relato curto

Por outra banda, a II edición do Concurso de Relato Curto “O Enxeño Engaiolado” que este ano introduce como novidade a categoría de conto infantil, vén de pechar o prazo de recepción de traballos. Agárdase agora polo fallo do xurado.