Lograr un concello máis accesible para os seus cidadáns e no que os peóns sexan os protagonistas son os obxectivos das políticas que desenvolve o goberno de Gondomar. Deste xeito segue apostando por plans de accesibilidade que permitan que sexa unha realidade. E agora dáse un paso máis sacando a concurso público a instalación do ascensor para a casa da cultura, un inmoble de tres pisos.
Unha iniciativa que será o primeiro paso para reformar integralmente o edificio público que alberga na actualidade a biblioteca municipal, en proceso de catalogación e inventario das súas obras, así como un salón de actos e oficinas administrativas na súa planta baixa, como é o caso da Oficina Municipal da Xuventude (Omix).
A intención do goberno local é que a biblioteca se poida estender ás tres plantas, ao cubrir as funcións do salón de actos alí presente o auditorio municipal Lois Tobío.
