A sede da Asociación Española Contra o Cancro (AECC) en Mos reabriu de novo as súas instalacións para volver atender ás persoas con esta enfermidade e as súas familias de forma gradual e de acordo á Guía de boas prácticas nos centros de traballo do Ministerio de Sanidade. Polo momento, o horario será reducido, todos os mércores de 10.00 a 12.00.
Esta crise sanitaria non impediu que a AECC seguise desenvolvendo a súa actividade asistencial, coa utilización de ferramentas telemáticas e dixitais. Ademais, tamén apoiou emocionalmente ás persoas afectadas polo Covid-19, ás familias que perderon un ser querido, independentemente da causa do falecemento, e aos profesionais de servizos esenciais. En total, desde o 16 de marzo ao 29 de maio, realizáronse 48 intervencións en Mos.
