Peregrinaxe e romaría no Santuario da Franqueira

Ao longo do ano A Cañiza acolle numerosas celebracións. Xunto coa do Xamón a máis relevante é a romaría da Franqueira, declarada tamén de interese turístico de Galicia e unha das máis lonxevas da Comunidade.

Son dúas as citas anuais neste santuario que congrega a milleiros de devotos e peregrinos: As Pascuillas, que se celebra o luns de Pentecostés, cando máis de 70 tallas procedentes de diferentes parroquias, de concellos de toda a provincia, peregrinan á Franqueira; e a romaría de setembro ou Natividade da Virxe, todos os 8 de setembro, que é cando teñen lugar a procesión coa virxe transportada nun carro tirado por bois ou vacas, as danzas e o drama da loita do moro e o cristián.

Na Cañiza tamén se celebra a festividade do Santo Cristo da Agonía, o segundo domingo do mes de xullo; a festa de Santa Teresa de Xesús, patroa da vila, e a romaría da Peña de Francia.