O Festival Xironsa cumpre 25 anos contra vento e marea

O Festival Xironsa celebrou no día de onte unha edición moi especial en Corvillón, Cambados.

Por unha banda, tratábase do 25 aniversario dunha cita de importancia para a promoción da música galega de onte e hoxe, pero ademais, recuperaba o cartel de concertos de artistas e bandas máis alá dos aportados pola asociación organizadora.

Só o vento amolou os ánimos, pois por momentos sopraba tan forte que se chegou a pensar na suspensión. Pero ao final fixéronse algúns cambios no escenario, como a retirada de lonas que puidesen desprenderse, e a festa continuou.

A xornada comezou con alboradas das agrupacións da casa e con Boudebou gaiteiros, dando paso ao concerto da Banda de Música Municipal de Ribadumia, que abriu apetito para o resto do día cunha actuación pensada para o festival. Tamén para o xantar de confraternidade na que participaron un bo número de comensais.

O programa da tarde chegou da man do espectáculo de humor, maxia, malabares e música «Cápsulas do tempo», do dúo conformado por John Jackson y Jack Johnson. Foi sobre todo un guiño aos máis cativos, pois un dos retos deste tipo de eventos é garantir un relevo xeracional. De feito, non faltaron os xogos tradicionais, aínda que non só atraeron aos de menor idade.

Un torneo da escoba mantivo ao público entretido ata que chegaron os seguintes concertos. Cantareiras de Madialeva foron as encargadas de empezar, pero o vento fixo das súas e detivo a actuación tras tirar algúns elementos de son. Foi cando se realizaron cambios no escenario para poder continuar.

Cabe recordar que o cartel tamén estaba conformado por Blues do País e o Sindicato da Verbena, Carapaus e De Vacas, como prato forte desta 25 edición.

Dende Xironsa levan meses traballando na organización dunha cita musical que viviu tempos mellores en canto a días de duración e cifra de concertos. Segundo se queixaron o ano pasado os seus membros, a falta de apoios suficientes para unha entidade das súas características, sen ánimo de lucro, e o incremento dos cachés dos artistas provocaron unha rebaixa na cantidade, que non na calidade, das edicións máis recentes dunha cita que, cabe recordar, non cobra entrada e non o contempla. De feito, o ano pasado quedou reducida ao xantar e ás actuacións dos seus grupos, pero este ano, sendo ademais o 25 aniversario, petaron en cantas portas puideron. Así, atoparon colaboración no Concello de Cambados, que entrou como coorganizador para aumentar a súa habitual aposta.