«Pereka» acada o primeiro posto no inicio da Copa Mörling

A regata do Sepelo, disputada en augas de Portonovo, foi a encargada de abrir a cuarta edición da Copa Mörling, a particular homenaxe que Culturmar tributa ao etnógrafo sueco Staffan Mörling pola contribución á investigación da vela tradicional galega. Esta edición da Copa rematou como acabou a anterior, coa dorna «Pereka» entrando primeira na liña de chegada, con José Antonio Dorado como patrón e Alberto Vicente «Chicaposas» como tripulante.

Os da Arousa souberon aproveitar as boas condición para a navegación para fuxir do resto de embarcacións que participaban na proba, 25 en total, e cruzar a liña de chegada en primeira posición. Detrás deles chegou outro barco da Illa, a «Nécora», con Braulio García como patrón e Adelino Santamaría como tripulante. Compretou o podio a tamén arousá «Selosa».

A do Sepelo é a primeira das regatas da Copa Mörling este ano, un certame que terá continuidade o vindeiro sábado na Illa, onde terá lugar o Triángulo do Cantiño.