Vinte anos de teatro con "Kvetch"

I. ENRÍQUEZ - VIGO Tras anos de perrucas, escenarios, cortinas, aplausos, risos, ovacións, bambalinas e guións, a compañía Teatro do Morcego celebra o seu vinte aniversario coa súa máis recente proposta teatral, "Kvetch: o rosmón". Da man de Álvaro Lavín e coa coprodución do grupo portugués Seiva Trupe esta "comedia americana sobre a ansiedade" chega hoxe, ás 20.30 horas, ó Teatro-Sala de Concertos do Centro Cultural Caixanova.

"Kvetch", un guión adaptado da obra do actor e director británico Steven Berkoff (La naranja mecánica, Octopussy), é unha sit com sobre as preocupacións e ansiedades da xente de a pé. Temas como o do cancro, o paro, a impotencia, os impostos, a declaración da renda, a calvicie ou o sobrepeso son uns dos poucos medos cos que xoga o guión desta comedia.

"É un espectáculo moi divertido, xoga coa técnica ´do a parte´, por un lado podemos escoitar as conversas normais que manteñen as personaxes e, polo outro, xoga cos pensamentos de cada un", explica Celso Parada un dos membros do reparto e fundador da compañía en 1989.

Este colectivo teatral en galego, que naceu en Cangas a finais dos oitenta, achéganos agora este último proxecto como compañía residente de Narón, cun elenco no que sobresaen nomes como o de Mónica Camaño, Miguel Pernas, Dorotea Bárcena e Mundo Villalustre e co actor madrileño Álvaro Lavín como director debutante, "un experto na comedia da arte que domina á perfección as claves do espectáculo", di Parada.

A obra, que xa xirou por distintas cidades e festivais de teatro tanto de Galicia coma de Portugal, seguirá a súa viaxe por localidades coma O Barco, As Pontes, Muros, Pontevedra ou Carballiño nos próximos meses. Será coa chegada do outono que este colectivo de teatreiros ofrecerá o seu novo proxecto, "un espectáculo infantil musical que aínda non ten nome pero que presentaremos no teatro de Narón en novembro", anuncia Celso Parada.