"Primeira edición" de O Nordés

ILDARA ENRÍQUEZ - VIGO Unha cidade única, cosmopolita, urbana, intensa e en continuo movemento. Un elenco envexable, guións enxeñosos e divertidos e unha realización sublime. Con esta flamante proposta comeza a nova programación da Televisión de Galicia, que inclúe cambios nos programas de sempre e novidosos proxectos á súa grella na próxima semana.

Ambientada na cidade de Vigo, a teleserie "O Nordés" achega o mundo do xornalismo á esfera máis próxima e actual. Unha ficción que, en palabras dun dos directores, Alfonso Zarauza, presume de ser "diferente, cunha imaxe máis moderna e achegada ás técnicas do cine e do videoclip".

A serie retrata con altas doses de realismo a Galicia do século XXI, o día a día dos redactores do xornal, a creación das noticias a partir dos sucesos de actualidade e as contradicións propias dos xornalistas no tocante á ética profesional e a ameaza das influencias financeiras e políticas nos medios.

Este novo proxecto, producido por CTV e Zopilote, fuxe do costumismo que outras veces marcou o éxito de producións como "Mareas Vivas" ou "Terra de Miranda" e avoga por un hiperrealismo co que "de seguro que fará historia", asegura Rosa Vilas, directora da cadea de televisión galega.

A filmación dos trece primeiros capítulos levouse a cabo na cidade de Vigo e nos interiores da redacción do xornal (o decorado más grande construído en Galicia), contou cun total de 130 persoas (entre guionistas, cámaras, maquilladores e demais) e supuxo un investimento de 90.000 euros por episodio. Un labor extremadamente difícil no que interveu o factor económico, xa que a ficción galega opta a un dos investimentos máis baixos da península. Porén tanto produtores coma directores coinciden en que esta será unha das novidades estrela da grella deste ano, unha proposta "intelixente, urbana e entretida" que chegará a todo tipo de públicos.

"Unha trama de intriga que ten moito que ofrecer onde o xornalismo e a cidade serán os principais protagonistas", relata Andrés Mahía, un dos produtores de "O Nordés".

Entre o grupo de actores que ambientará os membros da redacción do centenario xornal vigués destacan nomes, de sempre, coma os de Mabel Rivera, X. Manuel Olveira Pico, Isabel Risco, Víctor Fábregas, Xulio Abonjo e Monti Castiñeiras e algunhas das novas propostas do audiovisual galego coma Olalla Salgado e Isabel Risco.