Cine Miúdo chega un ano máis da man do Primavera do Cine en Vigo para mostrar ós máis pequenos a estreita relación que hai entre o cine e a música e convertelos nos auténticos protagonistas da xornada. Entre o 9 e o 11 de maio no Teatro Afundación, os cativos poderán ver diferentes pezas de cine musicalizadas ó vivo grazas ó trío Casperverk e ata poderán substituílos e ser eles mesmos os encargados de harmonizar os filmes. A iniciativa promovida polo Primavera do Cine está destinada exclusivamente ós colexios. Será necesario que o centro formalice a inscrición no correo electrónico cinemiudo@primaveradocine.com
A través de diferentes xogos e actividades, o programa de Cine Miúdo dividirase nun total de catro bloques nos que se explorará a vinculación da música co cinema.
A parte máis divertida chegará cando sexan os propios rapaces os que toquen diferentes instrumentos de percusión para facer, en directo, a banda sonora dun anaco de película. Así descubrirán o emocionante de facer música para o cine. Ademais asistirán a un pequeno concerto no que Casperverk interpretará o comezo da clásica banda sonora de Indiana Jones.