Máis de 3.500 escolares de educación primaria de 43 colexios do concello de Vigo participaron durante os meses de abril, maio e xuño na campaña posta en marcha por FCC, empresa adxudicataria dos servizos de recollida de residuos, limpeza urbana e limpeza de praias da cidade de Vigo, e Contenur, empresa responsable do mantemento e limpeza dos colectores da cidade.
Esta iniciativa ten por obxectivo ensinar aos máis pequenos a importancia de reciclar e manter limpa a cidade. Dinoseto foi o responsable, a través dunhas unidades didácticas e dunha unidade móbil, de mostrarlle aos nenos de segundo, terceiro e cuarto de primaria, as principais claves da reciclaxe e a limpeza. En palabras de Guillermo de Cal, delegado de FCC en Vigo, "queremos iniciar ás nenas e nenos na responsabilidade do coidado e da limpeza da cidade dunha forma divertida e didáctica. Con esta campaña esperamos que os rapaces se conciencien cada vez máis da importancia da correcta separación dos distintos residuos e materiais para a conservación e protección do medio ambiente".
A campaña contou cunha unidade móbil, con Dinoseto como protagonista, que viaxou polas mañás aos centros de ensino. Unha vez no colexio, persoal da campaña explica a importancia da reciclaxe nos colectores correspondentes (amarelo, azul, verde, pillas e lixo orgánico) e da consellos para manter limpa a cidade tales como non tirar desperdicios na vía pública, empregar as papeleiras públicas ou depositar a bolsa de lixo sempre no interior dos colectores, entre outros. Nesta unidade móbil, os rapaces practican a través dun xogo o aprendido anteriormente. Dinoseto está presente en toda a imaxe da campaña e nas unidades didácticas entregadas anima aos nenos "a ser heroes da reciclaxe e da limpeza".
Vigo Recicla FCC é a empresa adxudicataria dos servizos de recollida de residuos, limpeza urbana e limpeza de praias da cidade de Vigo desde 1989 e forma parte da UTE Vigo Recicla, xunto con Contenur. Vigo Recicla conta cunha flota de 16 operarios e 14 vehículos.