O primeiro tomo adicado á gaita galega editado por Ton e Son foi "Tradicionalmente", de Carlos Estévez; vinte pezas para gaita galega compostas polo músico vigués, das que interpreta doce no CD que acompaña ao libro. "Son pezas dun corte moi tradicional, mesmo bastante enxebre", explica o gaiteiro, que buscou facer unha selección variada de temas no que respecta ao ritmo.
"O meu estilo sempre é de corte tradicional, moi folclórico e moi enxebre. É coido que a miña maneira de compoñer emula a aqueles gaiteiros de antes que, sen saberse compositores, inventaban melodías. Eu busco aquelas melodías antigas, clásicas, e sobre iso elaboro algo novo", relata.
Estévez lembra o labor doutras editoriais á hora de difundir a música tradicional entre o gran público. "Edicións do Cumio, por exemplo, sempre tivo unhas iniciativas moi boas apostando pola tradición, con gaiteiros de moito renome. Rafa Crespo, neste caso, está a facer o mesmo pero adicándonos un libro a cada gaiteiro".
Unha idea "fantástica" para que os intérpretes teñan a man novas melodías "e unha oportunidade para que todos aqueles que temos no noso bagaxe unhas inquedanzas musicais poidamos dar a coñecer as nosas composicións", engade.
