Os alumnos do IES Santa Irene de Vigo venceron no certame "Cooperativismo nas Escolas" que promoveu a Xunta. O director xeral de Orientación e Promoción Laboral, Alfonso Marnotes, participou onte na entrega dos premios desta actividade que forma parte do programa que a Consellería de Economía, Emprego e Industria co Consello Galego de Cooperativas están a desenvolver con motivo do Día do Cooperativismo, que se celebra este ano o sábado 2 de xullo.
'Cooperativismo nas Escolas' é unha iniciativa coa que se promove entre os estudantes de Galicia o coñecemento desta fórmula empresarial e os valores que representa. Alumnos e alumnas do IES Santa Irene resultaron premiados en dúas modalidades do certame coas obras "A auga no espazo e no tempo" e "Xogos interactivos: proxecto Santa Irene" e recibiron materias didácticos, audiovisuais ou informáticos valorados en 4.000 euros.
Xunto coa entrega de premios, os estudantes asistiron á obra teatral Antía, Wamba e o regato pequeno que foi representada por A Tropa de trapo e coa que reflexionaron sobre a solidariedade e a igualdade.
