A Asociación de Estudos Galegos propón reduci-lo número de centros

M.MATO - VIGO O presidente da Asociación Internacional de Estudos Galegos, o inglés Craig Patterson, propuxo onte en Vigo, no marco do Simposio Ecolingua, reduci-lo número de centros de Estudos Galegos no estranxeiro (actualmente, uns 50) de maneira que se conservaran aqueles que presentaran unha aposta pola lingua e cultura galega máis forte, co fin de fortalecelos máis.

Co peche dalgúns centros, irían "fomentando os centros más fortes" para, a longo prazo, artellar unha rede de centros maior. Craig Patterson aproveitou para demandar tamén un cambio no enfoque da política de axudas á edición de libros. Segundo o seu punto de vista, a Administración autonómica "debería subvencionar máis a promoción cá edicion de obras".

Patterson realizou estas declaracións na última mesa do Simposio na que tamén interviron o escritor Suso de Toro, Iván Area Carracedo, da Universidade de Vigo e Xulián Maure. Este último, da Asociación Galega de Traductores, recoñeceu que "a situación do galego non é a mellor".

Ó seu xuízo, o principal problema é a difusión dos traballos a través de internet e de forma gratuíta. Sinalou que "nós perdímo-lo tren da imprenta e agora, estamos perdendo o tren do futuro", en alusión á falta da dixitalización gratuita de milleiros de libros en galego.

Na mesa anterior, a organización xuntara a membros de Prolingua, Queremos Galego, Cambia Galicia o Galego-Patrimonio da Humamide nun debate. Neste, o resentante de Galicia Bilingüe José Luis Mato avogou polo "respeto á lingua materna" de maneira que as materias troncais para os estudantes sexan impartidas na lingua materna ata que os mozos teñan competencia lingüística plena.

Xabier Docampo, de Prolingua, criticou que Galicia Bilingüe foi creada para "desmantela-los tibios avances do galego". Respecto da imposición do galego que critican, Docampo sinalou que era "unha mentira".

Fran Rei, de plataforma Queremos Galego, apuntou que na actualidade "hai unha base social que quere o galego e que está disposta a mobilizarse na súa defensa".