A Televisión de Galicia prepara "Última hora", unha nova serie sobre xornalistas

A. SAÁ - VIGO A nova aposta da Televisión de Galicia chámase “Última hora”, está rodada maiormente nos exteriores de Vigo e ten como trama central a actualidade política, económica e social contada a través dos xornalistas que traballan no diario “O nordés”. O director desta nova ficción semanal que se estreará na nova temporada da Galega é Alfonso Zarauza.
Entre os seus protagonistas atópanse os actores Xosé Manuel Olveira “Pico”, Monti Castiñeiras, Mabel Rivera, Belén Constenla, Ledicia Sola e Evaristo Calvo, entre outros.
A serie comeza coa morte do editor do xornal. Tras o seu falecemento, a viúva deste terase que facer cargo do medio e atoparase con todas as dificultades propias dun xornal, entre outras co interese dun empresario cun pasado escuro por facerse co diario.
Xosé Manuel Olveira “Pico” encarna ao director do xornal “O nordés”, un diario independente integramente escrito en galego. “O meu personaxe é un home serio, pero tamén con certo sentido do humor. Fai o papel de pai na redacción porque se preocupa polos xornalistas e porque lles ensina a través da súa experiencia que camiño deben seguir para a cobertura dalgunhas noticias”, sinala o actor.
“Última hora” é unha serie moi realista que recurre en ocasións a toques de comedia e drama. “Aínda que xa se fixeron ficcións de xornalistas, esta está enfocada dende outro punto de vista e toca temas moi actuais, como a crise económica, a folga do metal ou a prostitución”, explica Olveira.

Reflexo de Vigo

A cidade de Vigo serviu como escenario para os exteriores. “A maior parte das series están gravadas na Coruña ou en Santiago, pero reflexa Vigo dunha maneira fantástica”, afirma.
A primeira temporada de “Última hora” rematou de gravarse hai uns días despois de tres meses de traballo. O resultado son 13 capítulos de 50 minutos que se emitirán semanalmente. “Ten todos os ingredientes para ser un éxito polo seu carácter realista, pero isto das audiencias é un misterio”, recoñece Xosé Manuel Olveira.