O gaiteiro galego Alberto Coya faise co premio Mac Crimmon en Lorient

M. MATO - VIGO A edición número 39 do Festival Intercéltico de Lorient xa fala un pouco máis de galego. O gaiteiro galaico Alberto Coya fíxose onte co primeiro premio do prestixioso Trofeo Mac Crimmon ao que chegaron como finalistas tres galegos e tres asturianos.
“Xa antes de empezar a tocar a gaita, chamábame a atención Lorient e o trofeo Mac Crimmon. Faime moita ilusión gañalo”, explicaba onte a través do fío do teléfono desde Lorient.
A vila bretona tamén fala un pouco máis de galego desde onte trala actuación pola noite e no Gran Teatro de Lorient da Orquestra Folc do Conservatorio de Música Tradicional de Vigo SonDeSeu, dirixida por Rodrigo Romaní.
Na mañá, ademais, o Festival Intercéltico de Lorient –que este ano adica a súa edición á Galicia e á súa música, con preto de 20 bandas e solistas da terra convidados– acolleu un espectáculo de músicas e danzas dos países celtas con bandas de gaitas galegas, bailaríns escoceses así como da Illa de Man.

A gran noite

Lorient prepárase para a gran festa do luns á noite que leva o nome de “A grande noite de Galicia”. No Espazo Marítimo, actuarán a Orquestra Folc SonDeSeu e Berrogüetto nun espectáculo único e especial pensado para esta ocasión.
Nos vindeiros días, os directos galegos serán os de Crema de Gaita, Carlos Núñez e Susana Seivane, entre outros.