Seis cidades propoñen a Carvalho Calero como homenaxeado para as Letras Galegas

MAR MATO - VIGO No vindeiro 2010, cumpriranse 20 anos do pasamento de Ricardo Carballo Calero (Carvalho Calero), así como un século do seu nacemento. Como homenaxe á súa obra e ao seu compromiso social, un total de seis cidades aprobaron onte solicitar á Real Academia Galega (RAG) que o autor de Gramática Elemental del Gallego Común e "pai" do galego reintegracionista (defendía que o galego e o portugués forman parte do mesmo diasistema lingüístico, o idioma luso) sexa o homenaxeado no Día das Letras Galegas.

O acordo das concellerías de Cultura de Vigo, Compostela, A Coruña, Ferrol, Ourense e Pontevedra (botouse en falta Lugo, onde foi director dun colexio e estreou a súa primeira obra de teatro) tomouse onte en Santiago cunha crítica subxacente: aos 19 anos da súa morte "aínda non recibiu o seu merecido recoñecemento".

A concelleira de Cultura de Compostela, Socorro García, explicaba onte que Carvalho Calero "conta cunha das máis completas e extensas traxectorias vitais en defensa da cultura galega", convertíndose "nun dos persoeiros fundamentais no campo da literatura e lingua galegas". Desde hai tempo, a Fundaçom Artábria de Ferrol e a Associaçom Galega da Língua (AGAL) lévano propoñendo para o Día das Letras Galegas, cunha campaña que segue en marcha na web www.carvalhocalero2010.net.

En AGAL, resaltan "a súa extensa obra escrita, a variedade de xéneros cultivados, o seu traballo no Seminario de Estudos Galegos, o seu compromiso político-social, a represión sufrida (xulgado por ser oficial do exército republicano o que o levou ao cárcere e lle impediu adicarse ao ensino oficial)". Nas súas obras, destacan Gramática Elemental del Gallego Común ou Historia da Literatura do século XX.