"0,7% Molotov" faise co Dieste de Teatro

M. MATO - VIGO A obra 0,7% Molotov que trata con ironía e o humor o tema do compromiso político e a dificultade de adoptalo sen caer en contradicións resultou gañadora onte do Premio de Teatro Rafael Dieste da Deputación da Coruña.
O seu autor, o moañés Santiago Cortegoso, fíxose co galardón, que inclúe un premio de 6.500 euros e a posta en escena da peza. O premio é un dos máis prestixiosos de Galicia neste eido e que en anos anteriores recaeu en obras como A ciencia dos anxos, de Inma Antonio, Final de Película, de Gustavo Pernas ou Unha primavera para Aldara, de Teresa Moure, esta última gañadora de sete galardóns nos últimos María Casares.
Santiago Cortegoso, aínda que a maior parte da súa traxectoria no teatro ten sido como actor, principalmente, de Teatro de Ningures (na que participará na nova obra, Os cómicos dell´auto, na estrea o día 3 de xullo como espectáculo de rúa na Mostra de Teatro Cómico e Festivo de Cangas), tamén conta con obras de teatro escritas por el. Unha delas, Hamster, será estreada en outubro en Madrid, tras gañar os II Encuentros Magalia. Outros textos seus forman parte tamén do último espectáculo da compañía DisqueDanza baixo o título de Desmemoriados
Para Cortegoso, o Dieste supón un premio "moi importante". Admitiu que "o que máis ilusión me fai é levalo á escena, o que é unha satisfacción".