IVÁN LEIS / REDONDELA
Nenos e maiores tiveron onte en Saxamonde a oportunidade única de participar dun dos traballos esquecidos do agro galego: a malla do centeo. Era tradicional polo mes de agosto que os veciños se xuntaran para facer saír o gran do cereal e separalo da palla, ben manualmente, con paus, ou por medios mecánicos, coma onte fixeron no campo de fútbol da parroquia.
Esta demostración da malla foi unha idea da Asociación Sociocultural "Chan das Pipas". O membro da directiva Paulo Jablonski conta que "queriamos facer unha actividade diferente en verán e como contabamos cunha malladora mecánica dun veciño, aproveitámola".
O pasado febreiro plantaron en varias eiras o centeo. "Hai unha semana fomos recollelo e trouxémolo en tractores", conta Pablo, mentres axuda a meter o centeo na malladora. "Estas máquinas empezaron a usarse a principios do século XX pero precisan igualmente do brazo humano, do apoio de todos os que queiran participar".
O premio aos asistentes foi unha bebida, tamén a piques de esquecer: as sopas de burro cansado. Feita con viño, pan e azucre, "é fresca e invita ao desprendemento da lingua e ao baile", explica o organizador.
Neste ambiente lúdico non podía faltar a música, que puxo o grupo de gaitas "Terra Meiga" de O Viso.
Animados polo traballo e as sopas, os membros de "Chan das Pipas" rematan a festa co orgullo de ter recuperado un intre da cultura labrega, unha vella actividade campesiña que é patrimonio etnográfico.
