50 anos de cartas de amizade

Dous dos persoeiros máis destacados da cultura galega do século XX, Ramón Otero Pedrayo e Xosé Filgueira Valverde, mantiveron durante medio século unha amena correspondencia que se recolle agora nun epistolario. Éste testemuña os variados intereses dos dous autores, por exemplo a súa preocupación pola marcha da Academia ou do Seminario de Estudos Galegos, pero tamén da conta da súa amizade, unha longa relación de admiración mutua na que tamén se falaba da familia ou dos sentimentos. "Este epistolario", afirma a súa transcriptora, "é un tratado de amizade".

S. R. - PONTEVEDRA Seica os bos amigos deberían elixirse coma os libros preciosos: forzosamente non poden ser moitos senón escollidos, coñecidos de anos, imprescindibles. Como bos bibliófilos, Filgueira Valverde e Otero Pedrayo escolleronse con tino e logo foron dando conta da súa amizade en centos de cartas que agoran aparecen na obra "Epistolario de Xosé Filgueira Valverde e Ramón Otero Pedrayo".
Son en total 299 cartas e tarxetas asinadas entre os anos 1927 e 1976. Salvo sorpresas, trátase da totalidade da correspondencia que intercambiaron os intelectuais. A súa publicación pecha os eventos programados co gallo do centenario do nacemento de Filgueira Valverde, que foi fundador e director do Museo de Pontevedra, onde se presentou a obra.
As cartas pertencen os arquivos da Fundación Penzol de Vigo e do Museo e a súa compilación e transcripción correspondeu a María Jesús Fortes Alén, arquiveira do Museo de Pontevedra. Ésta incidiu en que "a temática é moi diversa, compartiron moitos traballos, por exemplo na Academia Galega, tamén publicacións, proxectos no Seminario e moitos tipos de intereses, pero tamén se fala nelas da familia e dos sentimentos".
O presidente do Consello da Cultura Galega, Ramón Villares Paz, é o autor do texto introductorio do epistolario e un dos representantes da cultura galega que onte se deron cita en Pontevedra na presentación da obra, un acto no que exerceu como anfitriona a vicepresidenta provincial, Teresa Pedrosa, e ao que tamén asistiron o escritor e director de Galaxia, Víctor Freixanes, o vicerreitor da Universidade de Vigo Ramón Area e o subdirector xeral de Caixanova, Antonio Gómez Rivera, entre outros. E entre os asistentes, familiares de Filgueira Valverde e estudiosos como Alonso Montero.