"Alcalde, por que eres do Bloque e non do PP?"

"Cando cheguen as eleccións, vas querer seguir sendo alcalde?", "Por que non hai beirarrúas en Salcedo?", "Podes pintar a nosa escola de vermello?", "Traballa moito un alcalde?", son algunhas das difíciles preguntas ás que Lores tivo que facer fronte, interrogado por un grupo de escolares de Salcedo.

F.M. - PONTEVEDRA O alcalde Lores tivo que enfrentarse onte a unha das "rodas de prensa" máis complicadas do seu mandato. Un grupo de escolares do colexio San Martiño de Salcedo, de entre 8 e 9 anos de idade, someteron ao rexedor a algunas desas preguntas que un político en activo prefire eludir.

A natural sinceridade dos rapaces meteu ao primeiro edil de Pontevedra nalgún apuro, ao preguntarlle polo tempo que leva na Alcaldía, e si aínda vai querer seguir no choio cando cheguen de novo as eleccións. Unha rapaza de oito anos descubríu impresionada que cando ela naceu, Lores xa era alcalde: ¡Dez anos! ¡Arrea!". Máis que toda unha vida para a pequena.

O rexedor nacionalista tivo que desplegar a súa mellor oratoria para contestarlle a outra rapaza á pregunta de "por que eres do Bloque e non do PP?", algo que, ao parecer, causaba extrañeza á pequena. Lores foi o máis didáctico que puido: "Porque penso que Galicia é o máis importante, e por iso son dun partido para o que Galicia é o máis importante... Porque para min o Bloque é o mellor partido", resumíu.

Algúns escolares semellaban que traían a pregunta encargada da casa, e así preguntaron ao rexedor por que Salcedo "está tan abandonada", ou que obras ten pensado facer na parroquia, ou por que non teñen beirarrúas. Nestas cuestións o alcalde tiña a leción aprendida, e explicou os proxectos para a zona intentando facer asequible o programa de goberno a un cidadán de oito anos.

No capítulo das peticións, os escolares non escatimaron. Pediron desde semáforos "que fan ruidiño" para o seu barrio, ata que o alcalde lles pinte a escola de vermello, "ou senón de amarelo", apuntou outro.

Os cativos de Salcedo tamén se interesaron pola razón que levou a Lores a "deixar de ser médico", por cantas horas traballa no día, ou por si é doado ser alcalde.