REDACCIÓN - PONTEVEDRA
"Unha lingua que che lambe até o corazón", "o galego séntese, o galego lévase" ou "o galego mola no currelo e na escola" son algunhas das fases finalistas do concurso "E de que irá isto?", unha novidosa proposta pensada para os máis novos da cidade.
A Concellería de Normalización Lingüística convocou aos mozos a buscar pistas pola cidade, agochadas baixo o formato de códigos bidi, en pancartas e carteis. Os códigos tiñan que subirse á rede e tras superar un quebracabezas os participantes debían presentar a súa frase.
Máis de 300 participantes nas redes sociais e máis de medio cento de lemas presentados mostran o éxito da convocatoria. Finalmente, a frase gañadora "foi unha das que máis gustou en Tuenti e o xurado considerou que se trataba da de máis calidade", precisou o concelleiro de Normalización, Demetrio Gómez.
Éste encabezou onte no concello a entrega de premios ao gañador do concurso, que recibiu un lote de libros, material promocional da campaña "A lingua latexa!" (na que se enmarca o concurso) e entradas para todos os actos culturais que celebra o concello no Pazo e no Principal.
O deseñador explicou que "vin os códigos en internet e chamaronme a atención porque aquí é unha fórmula que non se emprega moito pero sí noutros países e decidín participar".
Pola súa banda, o xurado valorou especialmente o feito de que se trate dun lema "dinámico e alegre que fuxe da frase clásica de promoción da lingua".
Demetrio Gómez anunciou durante o acto que partir de agora iniciase un xogo para implicar á mocidade no uso do galego: os rapaces que acudan ao Servizo de Normalización do concello cun lema (Eu latexo) recibirán regalos, como camisetas, chapas etc.
