REDACCIÓN - PONTEVEDRA
O gaiteiro Carlos Núñez será o encargado de dar comezo á sexta edición do "DUF", festival de pandeiros de man de Pontevedra. O músico internacional participará nunha charla-coloquio baixo o tema "Alborada no Brasil", que se celebrará mañán, ás seis da tarde, no Museo de Pontevedra. Carlos Núñez falará sobre a súa experiencia musical no Brasil.
O Concello de Pontevedra, a Central Folque e o Centro Galego de Música Popular organizan este VI Encontro Internacional de Pandeiros de Mao, que se celebrará os días 11, 13 e 14 de novembro, con Brasil como país convidado. Unha "haima" na praza do Teucro será o centro do encontro, cun programa conformado por concertos, obradoiros, charlas, artesanía musical e outros.
A concelleira de Cultura Lola Dopico, e os coordinadores do evento, Marcelo González e Olga Nogueira, presentaron onte esta nova edición adicada a Brasil, pais "onde o pandeiro acadou grandes cotas de evolución técnica", explicaron.
Entre outros estarán nesta mostra, Marcos Suzano e Carlos Núñez. Celebrarase ademais un "Serán Urbano", o sábado 14 á noite, nunha cita aberta a tódolos tocadores e bailadores que queran participar.
Os organizadores destacaron o peso que este ano cobran as actividades de integración social entre a comunidade galega, árabe e brasileira afincada en Galicia, asi coma as actividades ao redor da cultura brasileira que se desenvolverán na "haima DUF". Marcos Suzano e Alex Meirelles actuarán o venres 13 ás 21.00 horas, no centro social Caixanova.
