O Goberno local esixe á Xunta que faga cumprir a Sogama o seu contrato

REDACCIÓN - MARÍN A Xunta de Goberno local aprobou unha proposta da Concellaría de Medio Ambiente, presidida pola edil nacionalista Pilar Blanco, na que se insta a Xunta de Galicia, concretamente á Consellaría de Medio Ambiente, a que adopte as medidas necesarias para que Sogama cumpra coas súas obrigas contractuais íntegras, entre as que figura prestar a xestión dos voluminosos. Dende o departamento municipal lamentan que o conselleiro unicamente se limite a recoñecer o problema que teñen os concellos á hora de buscar unha alternativa á problemática ambiental, económica e de xestión que supón a decisión adoptada pola empresa, avalada en todo caso pola Xunta, de non seguir recollendo este tipo de residuos. Blanco tamén critica a "falta de información" por parte da Xunta.