As cantigas e a lírica medieval pechan as Xornadas de Historia da Feira Franca

REDACCIÓN - PONTEVEDRA A clausura das Xornadas de historia da Feira Franca será hoxe. No peche destas conferencias intervirán Henrique Monteagudo, da Universidade de Santiago de Compostela que falará da "Emerxencia do galego escrito (s. XIII): a lírica e a prosa documental". Será a partir das 11.00 horas na Casa das Campás.

Na conferencia pretenderase realizar unha exploración sobre o proceso de emerxencia do idioma galego como lingua escrita autónoma, que supuxo a ruptura coa tradición de scripta latino-galaica, e atendendo ás súas condicións histórico-sociais e culturais. Atenderase a dous terreos en que a emerxencia da escrita galega se verificou de xeito relativamente independente: a lírica trobadoresca e a prosa documental. Farase especial referencia dunha banda á hipótese sobre os primeiros pasos da lírica trobadoresca no noroeste peninsular (a Gallaecia Magna), e doutra ás novidades que propiciaron a aparición do galego escrito.

Ás 12.30 horas Fernando Reyes, director de Resonet, pechará as xornadas coa súa intervención sobre "Cantigas, a recuperación das perspectivas esquecidas".

Na súa conferencia explicará que as cantigas galegas medieváis forman, no seu conxunto e de forma incuestionable, un dos patrimonios culturais máis importantes de Galicia. A pesar desta importancia unha serie de dinámicas históricas, institucionáis e culturáis fortemente enraizadas contribúen a que hoxe as cantigas non sexan contempladas, estudadas e disfrutadas tendo en conta o seu aspecto cantado, indivisible, por definición do aspecto poético, linguístico e literario. As perspectivas científica, educativa e cultural actuais, nos seus variados modos, precisan de cambios sinxelos pero drásticos.